Gló Æfingastöð er miðstöð þjónustu og þekkingar í snemmtækri íhlutun og endurhæfingu fyrir börn og ungmenni. Hér starfa sjúkraþjálfarar og iðjuþjálfar með víðtæka reynslu af starfi með börnum, ungmennum og fjölskyldum. Við leggjum áherslu á samþætta þjónustu og gott samstarf við aðra sem veita þjónustu á sviði menntunar, félagslegs stuðnings og heilbrigðisþjónustu. Markmið með allri þjónustu á vegum Gló Æfingastöðvar er að efla þátttöku í daglegu lífi og byggja grunn að farsælli framtíð.
Að geta gert það sem máli skiptir er mikil-vægara en hvernig það er gert. Við þurfum ekki öll að gera eins!
Fjölskyldur þekkja börnin sín best. Hlustum á þær og tökum eftir því sem þær segja. Sýnum þeim virðingu og traust.
Finnum skemmtilegar leiðir til að efla líkam-lega hreysti, andlega heilsu og vellíðan.
Höfum gaman! Byggjum á styrkleikum og styðjum þátttöku í því sem vekur áhuga.
Við höfum öll þörf fyrir að taka þátt og tilheyra. Sköpum tækifæri til að rækta félagsleg tengsl og vináttu.
Dagurinn í dag leggur grunn að framtíðinni. Könnum leiðir,
prófum og sjáum möguleikana til að láta drauma rætast.
Þegar beiðni um þjónustu hefur borist höfum við samband og finnum tíma til að hittast. Það er alltaf einhver biðtími eftir þjónustu en við gerum okkar besta til að svara beiðnum eins fljótt og hægt er.
Við kynnumst barninu eða ungmenninu og fjölskyldu þess og kortleggjum í sameiningu hvar áhuginn, styrkleikarnir og framtiðardraumarnir liggja. Út frá því gerum við áætlun um hvernig við ætlum að vinna saman að þeim markmiðum sem sett eru í forgang. Í því getur falist bein íhlutun, aðlögun á umhverfi, útvegun hjálpartækja, ráðgjöf og stuðningur.
Foreldrar nýfæddra barna geta leitað beint til Gló Æfingastöðvar ef áhyggjur eða spurningar vakna um þroska barnsins þeirra. Fyrir öll sem eru orðin eldri en tveggja ára þarf tilvísun frá lækni að liggja fyrir áður en sótt er um þjónustu.
Þjónustan er fyrir börn og ungmenni sem af einhverjum ástæðum eiga erfitt með að framkvæma mikilvægar athafnir í þeirra daglega lífi og taka þátt í því sem skiptir þau máli. Þetta geta verið athafnir sem reyna ýmist á líkamlega, félagslega eða vitræna færni. Við leggjum áherslu á fjölskyldumiðaða nálgun. Í því felst að kortleggja í sameiningu áhugasvið, umhverfi og styrkleika barnsins og finna leiðir til að ná fram því sem þau vilja og geta.
Markmiðið er alltaf að efla þátttöku í daglegu lífi og byggja grunn að farsælli framtíð.
Teymisvinna innan og utan Æfingastöðvarinnar er mikilvægur þáttur í starfseminni. Hjá Gló Æfingastöð starfa reynslumiklir iðjuþjálfar og sjúkraþjálfarar sem koma að fjölmörgum teymum er varða þroska barna. Lögð er áhersla á gott samstarf og teymisvinnu með öðrum þjónustuveitendum og stofnunum.
